എത്രയിടങ്ങളിൽ രേഖകൾ കൂട്ടിമുട്ടുന്നു...?

ജീവജാലങ്ങൾ പൊതുപൂർവികരിൽ നിന്ന് കാലക്രമത്തിൽ പ്രകൃതിനിർദ്ധാരണത്തിലൂടെ രൂപപ്പെട്ടു വന്നവയാണെന്ന് കണ്ടെത്തുകയും സ്ഥാപിക്കുകയും ചെയ്ത പ്രകൃതിശാസ്ത്രജ്ഞനാണ് ചാൾസ് ഡാർവിൻ. 1837 ജൂലൈ മദ്ധ്യത്തിൽ ഡാർവിൻ, "ബി" എന്ന് പേരിട്ട നോട്ടുപുസ്തകത്തിൽ "വംശപരിവർത്തനത്തെക്കുറിച്ചുള്ള" ആദ്യത്തെ കുറിപ്പുകൾ എഴുതാൻ തുടങ്ങി. അതിന്റെ മുപ്പത്തിയാറാമത്തെ പുറത്ത് വരച്ചുചേർത്ത "പരിണാമവൃക്ഷത്തിന്റെ" ചിത്രത്തിനു മുകളിൽ, "ഇതാണ് എന്റെ തോന്നൽ"(I think) എന്ന് അദ്ദേഹം എഴുതിച്ചേർത്തു. പല ശാഖകളുള്ള ചെടിയായിട്ടാണ് ഡാർവിൻ പരിണാമത്തെ കണ്ടത്. ‘സ്പീഷീസുകളുടെ ഉത്ഭവ(On the Origin of Species)’ത്തിൻ്റെ ആദ്യ എഡിഷനിൽ ആകെയുള്ള ഒരു ചിത്രം ഇതാണ്.

സാമൂഹ്യപരിഷ്‌കർത്താവായ ഇ.വി.രാമസ്വാമി നായ്ക്കർ പെരിയാർ എന്ന പേരിലാണ് അറിയപ്പെട്ടിരുന്നത്. തമിഴ്നാട്ടിൽ ജനിച്ച അദ്ദേഹം ജാതിക്കെതിരെയും ബ്രാഹ്മണമേധാവിത്വത്തിനെതിരെയുമുള്ള സിദ്ധാന്തങ്ങൾ ഉയർത്തുകയും യുക്തിവാദം പ്രചരിപ്പിക്കുകയും ചെയ്തു. ദ്രാവിഡ കഴകം രൂപീകരിക്കുന്നതിൽ അണ്ണാദുരൈയ്ക്ക് ഒപ്പം മുന്നിൽ നിന്നത് പെരിയാർ ആയിരുന്നു. വൈക്കം സത്യാഗ്രഹത്തിൽ പങ്കെടുത്ത് പെരിയാർ ഇ. വി. രാമസ്വാമി നായ്ക്കർ അറസ്റ്റുവരിച്ചിരുന്നു. അതിൻ്റെ ഓർമ്മയ്ക്കായാണ് വൈക്കം നഗരമദ്ധ്യത്തിൽ അദ്ദേഹത്തിൻ്റെ പ്രതിമ സ്ഥാപിച്ചിരിക്കുന്നത്.

മരുന്ന് വിപണനരംഗത്തെ ചൂഷണവും കൊള്ളയും ലോക ശ്രദ്ധയിലേക്ക് കൊണ്ടുവന്ന ശിശുരോഗ വിദഗ്ദ്ധനാണ് ഡോ. ഒലിഹാൻസൺ (Dr Olle Hansson). അദ്ദേഹത്തിന്റെ ചരമദിനമായ മെയ് 23 ജനകീയാരോഗ്യ പ്രവർത്തകർ ഒലിഹാൻസൺ ദിനമായി ആചരിക്കുന്നു